काठमाडौँ, २२ भदौ गुण्डा नाइके दावा लामाको सहयोगी भनेर आरोप लागेका सत्यमान लामामाथि सम्पत्ति शुद्धिकरणको मुद्धा चलाउने तयारी गरेको छ । मंगलबार काठमाडौँबाट पक्राउ परेका लामालाई प्रहरीको अपराध अनुसन्धान महाशाखाले सम्पत्ति शुद्धिकरण मुद्धा चलाएको हो ।

प्रहरीले शुक्रबार काठमाडौँ जिल्ला प्रशासनबाट ६ दिने म्याद थपेर छानबिन अघि बढाएको महाशाखा प्रमुख एसएसपी धिरजप्रताप सिंहले दैनिक नेपाललाई बताए । लामाको म्याद नथप्न नेकपाकी सांसद नवीना लामाले जिल्ला प्रशासन कार्यालय पुगेर सिडिओलाई दबाब दिएको स्रोतले बताएको छ ।

सांसद लामाले अपराध महाशाखाका प्रमुख एसएसपी सिंहलाई समेत सत्यमानको विषयमा म्याद थप नगर्न र रिहा गर्न फोनमाफर्त दबाब दिएको बताइएको छ । यसअघि अघिल्लो पटक पक्राउ गरेका बेला लामालाई नवीनाले नै छुटाएकी थिइन् । तर, यो पटक प्रशासन र प्रहरीले सांसद नवीनाको दबाब स्वीकार गरेको छैन ।

गुण्डा नाइके लामा काभ्रेली गुण्डा दावा लामा समूहका हुन् । सांसद नवीना पनि काभ्रेकै हुन् । लामाले ठमेलका एक व्यापारीलाई ज्यानमार्ने धम्की दिएको आजावसहितको उजुरी परेपछि प्रहरीले उनलाई नियन्त्रणमा लिएको थियो ।

एसएसपी सिंहले सांसद नवीनालाई पक्राउ परेका लामाका विषयमा अनुसन्धान भइरहेको र उनी दोषी ठहरिए कानून बमोजिम कारबाही गर्ने जवाफ दिएका छन् ।