चार महीनाभित्र लगानीमैत्री कानून निर्माण हुन्छ : मन्त्री अधिकारी
काठमाडौँ, १९ मङ्सिर: संस्कृति, पर्यटन तथा नागरिक उडड्यनमन्त्री रवीन्द्र अधिकारीले लगानीमैत्री वातावरण बनाउन सरकार क्रियाशील रहेको बताउनुभएको छ । नेपाल चेम्बर अफ कमर्शले आज यहाँ आयोजना गरेको ‘नेपाल–कोरिया आर्थिक सम्बन्धका आयामहरु’ विषयको कार्यक्रमलाई सम्बोधन गर्दै उहाँले सरकारले चार महीनाभित्र लगानीमैत्री कानून निर्माण गर्ने बताउनुभयो । उहाँले भन्नुभयो, “लगानी भित्र्याउन कुन विषयमा बाधा छ, ती विषय तीन÷चार महीनामा हटाउँछौँ । नेपालमा हुन लागेको लगानी सम्मेलन अगावै सरकारले वैदेशिक लगानी भित्र्याउन आवश्यक पर्ने सम्पूर्ण कानून निर्माण गरिसक्छ ।”
नेपाल र कोरियाबीचको व्यापार सन्तुलन कायम गर्न निकै चुनौतीपूर्ण रहेको बताउँदै मन्त्री अधिकारीले व्यापार असन्तुलन न्यूनीकरण गर्न पर्यटन सशक्त क्षेत्र भएको र पर्यटनको माध्यमबाट व्यापार घाटा पूर्ति गर्न सकिने विश्वास व्यक्त गर्नुभयो । बढीभन्दा बढी कोरियामा रहेका बौद्धमार्गीलाई नेपालको भ्रमण गराउन ‘बौद्ध परिपथ’ लाई प्रभावकारी बनाउनु आवश्यक भएको बताउँदै उहाँले अब छिट्टै नेपाल एयरलाइन्सले काठमाडौँबाट कोरिया सिधा उडान भर्ने जानकारी दिनुभयो ।
नेपालका लागि कोरियाली राजदूत पार्क योग सिकले नेपालमा कृषि, पर्यटन, शिक्षा, स्वास्थ्य र उद्योगमा लगानीको सम्भावना भए पनि लगानीको लागि आवश्यक कानून पर्याप्त नभएको बताउनुभयो । नेपाल–कोरियाबीचको व्यापार अन्य देशको तहमा हुन नसकेको भन्दै उहाँले व्यापारिक सम्बन्ध बढाउनुपर्नेमा जोड दिनुभयो । राजदूत पार्कले नेपाल भ्रमण वर्ष २०२० लाई सफल बनाउन कोरियाले सक्दो सहयोग गर्ने प्रतिबद्धता व्यक्त गर्नुभयो । चेम्बरका अध्यक्ष राजेशकाजी श्रेष्ठले नेपालमा पर्यटन, कृषि तथा औद्योगिक क्षेत्रमा लगानी गर्न कोरियाली लगानीकर्तालाई आग्रह गर्नुभयो । यतिबेला मुलुकमा स्थिर सरकार बनेको र सरकार वैदेशिक लगानी भित्र्याउन गम्भीर भएकाले नेपालमा यतिबेला लगानीको लागि उपयुक्त समय आएको उहाँको भनाइ थियो ।
नेपाल र कोरियाबीच सन् १९७४ मा कूटनीतिक सम्बन्ध स्थापना भएको हो । कोरियाले नेपालको विकासमा विभिन्न क्षेत्रमा आर्थिक तथा प्राविधिक सहयोग गर्दै आएको छ । पूर्वाधार निर्माण, रेशमखेतीको विकास, जलविद्युत् आयोजनाको निमाण, सुशासन र स्वास्थ्यलगायत क्षेत्रमा सहयोग गर्दै आएको छ । त्यस्तै कोरियाली अन्तर्राष्ट्रिय सहायता नियोग (कोइका)मार्फत प्राविधिक शिक्षालयको स्थापना, सूचना प्रविधि केन्द्रको निर्माण, लुम्बिनीलाई विश्व शान्ति शहरका रुपमा विकासका गतिविधि अघि बढेको छ ।
नेपालबाट बिरालो तथा कुकुरको खाना, कटनका ज्याकेट, सङ्गीतका सामग्री, मदीरा, पिउने पानी, ऊनका कपडा तथा जनवारको रौँबाट निर्मित सामग्री कोरिया निर्यात हुँदै आएको छ । विभिन्न मेसिनरी पाटपूर्जा, औद्योगिक कच्चा पदार्थ, सवारी सधानको पाटपूर्जा, प्रिन्टिङ तथा फोटोकपी मेसिनलगायतका सामग्री आयात हुँदै आएको छ ।
सन् २०१७ मा रु १६ करोड ९० लाखको नेपाली वस्तु कोरिया निर्यात भएको थियो भने रु एक अर्ब एक करोड ६४ लाखको कोरियाली सामान नेपाल आयात भएको चेम्बरले जनाएको छ । दुई ठूला अर्थतन्त्र भएको मुलुक चीन र जापनको नजिक रहेको दक्षिण कोरियाले पछिल्लो समय द्रुत आर्थिक विकास गर्दै शक्ति राष्ट्रका रुपमा आफूलाई उभ्यान सफल भएको छ । विश्व बैंकका अनुसार दक्षिण कोरिया विश्वको छैटौं ठूलो निर्यात गर्ने देश हो भने व्यवसाय गर्न सहज राष्ट्रको सूचीमा चौथो नम्बरमा छ ।
-रासस
