मन्त्री केशव स्थापित पदबाट बर्खास्त, मन्त्रालयको जिम्मेवारी मुख्यमन्त्री पौडेल आफैले लिने
काठमाडौं, १६ कात्तिक । तीन नम्बर प्रदेशका भौतिक पूर्वाधार तथा विकास मन्त्री केशव स्थापितलाई पदबाट बर्खास्त गरिएको छ । मन्त्री स्थापितलाई प्रदेश नम्बर ३ का मुख्यमन्त्री डोरमणि पौडेलले पदबाट बर्खास्त गरेका हुन् ।
संविधानको धारा १६९ को उपाधार २ को खण्ड ‘ख’ अनुसार मुख्यमन्त्री पौडेलले स्थापितलाई बर्खास्त गर्दै उनको मन्त्रालयको जिम्मेवारी पनि आफैँले लिएका हुन् ।
मुख्यमन्त्री पौडेलका स्वकीय सचिव अनुप पौडेलका अनुसार तत्कालका लागि स्थापितले सम्हालेको भौतिक पूर्वाधार तथा विकास मन्त्रालयको जिम्मेवारी मुख्यमन्त्री पौडेल आफैले सम्हाल्नेछन् ।
संविधानले दिएको अधिकार अनुसार नै मुख्यमन्त्री पौडेलले मन्त्री स्थापितलाई बर्खास्त गरेको कुरा पनि स्वकीय सचिव पौडेलले जनाएका छन् ।
