काभ्रेमा म्यादी प्रहरीलाई सम्मानका साथ विदाई
प्रतिनिधिसभा तथा प्रदेशसभा निर्वाचनमा थप सुरक्षाका लागि भर्ति गरिएका म्यादी प्रहरीहरुलाई एक समारोहका बीच शुक्रबारबाट विदाई गरिएको छ ।
५५ दिन निर्वाचनको सुरक्षा सम्बन्धी सरकारी सेवा गरेर विदा भएका म्यादी प्रहरीलाई जिल्ला प्रहरी कार्यालय काभ्रेले विदाईमा फरक शैली अपनाएको थियो । जिल्ला प्रहरी कार्यालय काभ्रेले ५५ दिने सेवाका क्रममा उत्कृष्ट काम गर्ने ४ जना म्यादी प्रहरीलाई नगद सहित सम्मान गरेको छ ।
जिल्ला प्रहरी कार्यालय काभ्रेले अस्मिता अधिकारी, स्वविता वर्तौला, सनिप्रसाद श्रेष्ठ र उमा रम्तेल सहित ४ म्यादी प्रहरीलाई नगद सहित सम्मान गरेको हो । ‘केही समय भए पनि सरकारी सेवा गरेर विदा भएका म्यादी प्रहरीहरुलाई आगामी दिनमा कामको सम्मान हुन्छ भन्ने ज्ञानको विकास गर्न उत्कृष्ट म्यादीलाई पुरस्कृत गरिएको जिल्ला प्रहरी कार्यालय काभ्रेका प्रमुख सहकुलबहादुर थापाले बताए ।’ काभ्रेमा १५ सय १६ जना निर्वाचनका लागि म्यादी प्रहरीलाई खटाइएको थियो ।
