काभ्रेमा वाम गठबन्धन शक्तीशााली, नेपाली काँग्रेस कमजारे हुर्दै
काभ्रे/ आसन्न दोस्रो चरणको प्रतिनिधि तथा प्रदेश सभा निर्वाचनमा काभ्रेपलाञ्चोकमा वाम गठबन्धन बलियो देखिएको छ । स्थानीत तह निर्वाचनअनुसार जिल्लामा एमालेले तीन सय ३१ र माओवादीले एक सय २७ सिटमा जित निकालेका थिए ।
एमाले र माओवादीको जम्मा सिट चार सय ५८ हुन आउँछ । यता, कांग्रेसले दुई सय २२ सिट हात पारेको थियो । स्थानीय तहमा प्राप्त मतमध्ये सबैभन्दा धेरै एमालेले ६८ हजार ६ सय ४७ र माओवादीले ३० हजार ४४८ मत प्राप्त गरेका थिए । कांग्रेसले ६३ हजार एक सय ३९ मत प्राप्त गरेको थियो ।
वामपन्थी तालेमलमा दुई दलको मत जोड्दा ९९ हजार ९५ हुन जान्छ । जनमोर्चा नेपालको मत अझै जोडिएको छैन । नयाँ मतदातासमेतको मत जोड्दा वाम गठबन्धनमा झन्डै सबा लाख मत खस्ने अनुमान गरिएको छ ।
केही मत नयाँ थपिँदा र फोरम, राप्रपालगायतका दलहरूले मत दिँदा कांग्रेसको पक्षमा पनि झन्डै ७५ हजार मत रहेको अनुमान गरिएको छ । वाम गठबन्धनभित्र खटपट भएन र अन्तर्घात नहुँदा ४० हजार मत फरक पर्ने देखिन्छ ।
दुई लाख ७२ हजार मतदाता
प्रतिनिधि तथा प्रदेश सभा निर्वाचनका लागि जिल्लामा दुई लाख ७२ हजार दुई सय ८७ ले मतदान गर्न पाउने भएका छन् । यो संख्या स्थानीय तहको निर्वाचनभन्दा ४१ हजार चार सय ३८ धेरै हो । जिल्लामा रहेका कुल मतदातामध्ये महिला एक लाख ३५ हजार तीन सय ९७, पुरुष एक लाख ३६ हजार आठ सय ८९ र तेस्रो लिंगी एकजना रहेका छन् ।
जिल्ला निर्वाचन कार्यालय काभ्रेका निर्वाचन अधिकारी मधुकर पोखरेलका अनुसार स्थानीय तहको निर्वाचनमा दुई लाख ३० हजार आठ सय ४९ मतदाताको नामावली प्रकाशन भएको थियो । प्रतिनिधिसभाका लागि दुईवटा मात्रै निर्वाचन क्षेत्र रहेको काभ्रेपलाञ्चोक जिल्लामा सबैभन्दा धेरै मतदाता दुई नम्बर क्षेत्रमा छन् ।
जसमा ६८ हजार नौ सय ९० पुरुष, ६९ हजार पाँच सय २२ महिला मतदाता छन् । जम्मा मतदाताको संख्या एक लाख ३८ हजार पाँच सय १२ रहेको छ । क्षेत्र नम्बर १ मा ६७ हजार ८९९ पुरुष, ६५ हजार ८७५ महिला गरी एक लाख ३३ हजार सात सय ५५ मतदाता छन् ।
