काठमाडौं ८ असोज  :  एभोकाडो चोरेको आरोपमा काभ्रेका ५ सहित १२ जनालाई प्रहरीले गिरफ्तार गरेको छ । पूर्व आईजीपी मोतिलाल बोहराको निवास सहित काठमाडौंका विभिन्न व्यक्तिहरुको घरबाट भोकाडो चोरेको आरोपमा १२ जनालाई पक्राउ गरिएको प्रहरीले जनाएको छ ।

अपराध महाशाखा र प्रहरी वृत्त बानेश्वरबाट खटिएको टोलीले काभ्रेका यमबहादुर तामाङ, देव तामाङ, मिलन दुलाल, समिर तामाङ, उर्फ वादशाह, रामेछापका सञ्जीव खड्का, शंकर कठायत, निरज नेपाली, हेटौंडा घर भएका २० वर्षीय राजेश राई, राजिव गुरुङ, सुनसरीका मोहित दाहाल र झापाका प्रदिप यादवलाई पक्राउ गरेको हो ।काभ्रे घर भएका देव तामाङको योजनामा उनीहरुले विगत ३ वर्षदेखि काठमाडौंका विभिन्न स्थानबाट एभोकाडो चोर्दै आएको प्रहरी अनुसन्धानबाट जानकारी प्राप्त भएको छ ।

दुई समूहमा रहेका आरोपीहरुले बुद्धनगर, थापागाउँ, नयाँ बानेश्वर, मैतीदेवी, अनामनगर, शंखमुल, देवीनगर, नक्साल, ज्ञानेश्वर, चण्डोल र मालिगाउँस्थित घर कम्पाउन्डबाट चोरी गरेको प्रहरीले जनाएको छ । चोरीमा संलग्न समूहले राती घर कम्पाउन्डमा छिरेर चोर्ने र सस्तोमा फलफूल पसलमा बेच्ने गरेको महानगरीय अपराध महाशाखाका एसएसपी चन्द्रकुवेर खापुङले बताउनुभयो ।