सिरहा १ चैत्र । सिरहाको लहानस्थित मालपोत कार्यालयमा भएको बम विस्फोट परी ८ जना घाइते भएका छन् । कार्यालयको माथिल्लो तलामा आइतवार मध्यान्ह १२ बजेर ४० मिनेटमा कुकर बम विस्फोट भएको प्रहरीले जनाएको छ ।

प्रहरीका अनुसार विस्फोटमा परी मालपोत कार्यालयका नायब सुब्बा शिवकुमार यादव, लेखापढी व्यवसायी धनगढीमाई नगरपालिका–१३ का भोलाबहादुर मगर, गोलबजार नगरपालिका–६ का लक्ष्मी राना, बेचनी मगर, सिरहा नगरपालिका–१६ का लालबहादुर विश्वकर्मा, गोलबजारकी फूलकुमारी ठाकुर, भगवानपुर गाउँपालिकाका बद्रिनारायण यादव, धनगढीमाई नगरपालिका–४ का दिनेश भण्डारी घाइते भएका छन् ।

गम्भीर घाइते भएका दिनेश भण्डारीलाई थप उपचारका लागि हेलिकप्टरबाट काठमाडौं ल्याइएको छ । उनको ट्रमा सेन्टरमा उपचार भइरहेको छ । घटना स्थलमा गणतान्त्रिक मुक्ति मोर्चा गोइत समूहको पर्चा फेला परेको छ । घटना भएको केही समयपछि नै मोर्चाका संयोजक जयकृष्ण गोइतले विज्ञप्तिमार्फत घटनाको जिम्मेवारी लिएका छन् ।।