Logo

काभ्रेको चौरीदेउराली गाउँपालिका पनि साक्षर घोषणा



धुलिखेल, १ फागुनः काभ्रे जिल्लाको दुर्गम क्षेत्रमा पर्ने चौरीदेउराली गाउँपालिका साक्षर घोषणा भएको छ । पालिकाभित्र बसोबास गर्ने १५ देखि ६० वर्ष उमेर समुहका निरक्षर मध्ये ९७ प्रतिशत नागरिक साक्षर भएपछि आज साक्षर पालिका घोषणा गरिएको हो । शिक्षा, विज्ञान तथा प्रविधिमन्त्री गिरिराजमणि पोखरेलले पालिकालाई साक्षर पालिकाको प्रमाणपत्र हस्तान्तरण गरेका हुन् । ‘देशका कुनै पनि नागरिक निरक्षर नहुन भनेर संघ सरकारले विभिन्न कार्यक्रमहरु ल्याइरहेको छ, मन्त्री संघ सरकारले ल्याएका यस्ता योजनाहरु पुरा गरी दिगो विकासका सुचक समेत पुरा गर्न स्थानीय सरकारको महत्वपूर्ण योगदान रहन्छ ।’

कार्यक्रममा संघीय सासंद गंगा बहादुर दोङले समाजका हरेक नागरिक शिक्षित भएमात्रै राष्ट्रले मुहार फेर्ने भन्दै सिकेको ज्ञान र सीपलाई ब्यवहारमा लागु गर्न आग्रह गरे । प्रदेश सांसद रत्न ढकालले समाज सुधारको मेरुदण्ड नै शिक्षा भएको भन्दै यसलाई आत्मसात गरेर अघि बढ्नु पर्नेमा जोड दिए ।

योसँगै जिल्लाका १३ वटै स्थानीय तह साक्षर भएका छन् । अघि धुलिखेल, बनेपा, पनौती, नमोबुद्ध, मण्डनदेउपुर र पाँचखाल नगरपालिका तथा रोशी, महाभारत, तेमाल, बेथानचोक, भुम्लु, र खानीखोला गाँउपालिका साक्षर घोषणा भईसकेका छन् । जिल्लाका सबै स्थानीय तह साक्षर भएपछि शुक्रबार शिक्षा विकास समन्वय ईकाई र जिल्ला साक्षर घोषणा समितिले पत्रकार सम्मेलनको आयोजना गरेको छ ।

प्रतिक्रिया दिनुहोस्
error: Content is protected !!